2 წლის და 1-2 თვის ბავშვი

ფოტო: საბა ჩაჩავა, 2 წლის;

გამოგვიგზავნეთ თქვენი შვილების ფოტოები info@babyinfo.ge-ე!

მოძრაობა: პატარებს უმრავლესობა ამ ასაკში დადის, დარბის, კიბეებზე ადის და ჩადის გამართულად და მტკიცედ დგას ფეხზე. მათ უკვე შეუძლიათ ბურთით თამაში. თუ ჯერ არ გიცდიათ, დროა დიდი ზომის და მსუბუქი ბურთი შეუძინოთ. ჯერ ხელით თამაში ასწავლეთ, შემდეგ კი უკვე ფეხის დარტყმებსაც აითვისებს. 

ლაპარაკი: 2 წლისა და ერთი ან ორი თვის ასაკში პატარა 50-მდე სიტყვას ფლობს და შეუძლია მათგან მარტივი წინადადებების შედგენა. მას უკვე ესმის ორ ნაწილიანი მითითებები. შესაძლოა უჭირს გარკვეული ბგერების “შ”, “ჩ”, “ც”...წარმოთქმა.

კვება: შესაძლოა ნელა ჭამს და ცოტა ხანში თავს ანებებს ჭამას. ამის გამო კი ძალიან ცოტა რაოდენობით იღებს საკვებს. არ ინერვიულოთ და ნუ დააძალებთ. შეაქეთ მაშინაც კი თუ ცოტას შეჭამს. ჯერ მცირე ულუფა მიეცით და თუ ბოლომდე მოასუფთავა თეფში, შეაქეთ და დამატება შესთავაზეთ. ეცადეთ, რომ ჭამა არ გაჭიანურდეს და დაახლოებით 30 წუთზე მეტ ხანს არ გაგრძელდეს. ამ დროის გასვლის შემდეგ, თუნდაც არ ჰქონდეს ჭამა დასრულებული, აართვით თეფში და დაელოდეთ მომდევნო კვების დროს. 

თამაში: თვალის და ხელის კოორდინაციის განვითარებისთვის მეტად სასარგებლოა ძერწვა. პატარას ამ დროს უვარჯიშდება ხელისა და თითების კუნთები. ამიტომაც ხშირად აძერწინეთ სპეციალური სათამაშო საძერწი მასალით. გახადეთ ეს თამაში მისთვის უფრო საინტერესო და მიეცით დამატებითი ფორმები. შეგიძლიათ თავად დაუმზადოთ სათამაშო ცომი და ასევე მიიღოთ მონაწილეობა ძერწვაში.