8 თვის ჩვილი

ფოტო: გური შანშიაშვილი, 8 თვის;

გამოგვიგზავნეთ თქვენი შვილების ფოტოები info@babyinfo.ge-ზე!

ზრდა: პატარა სტაბილურად იმატებს წონაში თვეში დაახლოებით  0.5 კგ-ს, ხოლო სიმაღლეში საშუალოდ 1-2 სმ-ს. თუმცა მატების ტემპი ინდივიდუალურია და შესაძლოა თქვენი პატარას მატების ინდივიდუალური მონაცემები განსხვავებული იყოს. თუ ხელოვნურ კვებაზე გყავთ ის უფრო მეტს მოიმატებს წონაში.

მოტორული უნარები: დაახლოებით 8 თვის ასაკიდან პატარა იწყებს ხოხვას და მისთვის სამყარო გაცილებით საინტერესო ადგილი ხდება, რადგან მას უკვე დამოუკიდებლად შეუძლია გადაადგილება. იმატებს ასევე საფრთხეებისა და ტრამვების ალბათობაც. ამიტომ, ყურადღებით მოავლეთ თვალი თქვენს სახლს და შეუქმენით მაქსიმალურად უსაფრთხო გარემო. მოტორული უნახების დახვეწაზე მიუთითებს ის ფაქტი, რომ მას უკვე მარჯვედ შეუძლია მცირე ზომის საგნების მომარჯვება, იატაკიდან აკრება, ხელის და თითების მისი სურვილისამებრ მოხმარება. 

სოციალურ-ემოციური უნარები: პატარა უკეთ გამოხატავს საკუთარ ემოციებს და ასევე კარგად ესმის სხვების. შესაძლოა ტირილი დაიწყოს, მხოლოდ სხვა მტირალი ადამიანის თანაგრძნობით. თუ პატარა ბაღში დაგყავთ ან მასთან განშორება გიწევთ, ეს მისთვის მეტად მტკივნეულია, რადგან ის ფიქრობს, რომ თუ ვერ გხედავთ, მაშასადამე აღარ არსებობთ და ძლიერ განიცდის ამას. ასე მისი აღქმაა მოწყობილი და ძლიერ დაეხმარებით ამ გრძნობისგან გათავისუფლებაში, თუ დაანახებთ, რომ საგნები და ადამიანები იმისგან დამოუკიდებლად არსებობს, ხედავს ის მათ თუ არა. ეთამაშეთ დამალობანა, დაუმალეთ და აპოვნინეთ სხვადასხვა ნივთები. ასე ნდობასაც ისწავლის და ჯანსაღ მიჯაჭვულობასაც გამოიმუშავებს ადამიანების მიმართ. მიაჩვიეთ განშორებას ადრეული ასაკიდანვე, ეს დამოუკიდებლობის მოპოვებაში დაეხმარება. 

მას ასევე ბევრი მეთოდი აქვს საგნების გამოსაკვლევად და განსაკუთრებით მოსწონს მათი ჯანჯღარი და მიწაზე დახეთქება. ამაზე უფრო მეტად კი ის, რომ მის დაგდებულ ნივთებს თქვენ იღებთ და უკან უბრუნებთ. ამიტომაც სიხარულით იმეორებს ამ მოქმედებას. ის ასევე უკეთ ხვდება ნივთების დანიშნულებას.